Agrikultura sa Lalawigan ng Quezon, Sumigla


 

2015-08-25

 

 

Sa kabila ng pinsalang dulot ng pesteng cocolisap at bagyo ay muling napanumbalik ang sigla ng sektor ng agrikultura sa buong lalawigan ng Quezon.

 

Ito ang isa sa iniulat ni Governor David “Jay-Jay” Suarez sa kanyang ika-limang State of the Province Address at Joint Session ng Sangguniang Panlalawigan, Panlungsod at Bayan noong ika-24 ng Agosto, 2015 sa Quezon Convention Center, Lungsod ng Lucena.

 

Ayon kay Governor Suarez, mabilis na natugunan ng pamahalaang panlalawigan at Philippine Coconut Authority (PCA) ang pinsalang idinulot sa mga magniniyog at napababa agad sa manageable level ang peste ng cocolisap.

 

Ayon pa sa gobernador na ngayon ay nakikita na ang panunumbalik ng sigla ng mga niyog, luntian na ang mga dahon at gumaganda na ang pamumunga.

 

“Sa kabila nito, malaki pa rin po ang dapat nating gawin,” pahayag ng gobernador.

 

Muling binalikan ang Coconut Industry Development Plan, inayos at tiniyak na ang mga programa ay tutugon sa pangangailangan ng pamilyang magniniyog na dapat binuo ang plano kasama ang lahat ng coconut industry stakeholders at ang planong ito ang magsisilbing road map para sa pag-unlad ng industry ng niyog.

 

Samantala, naniniwala si Governor Suarez na nararapat lamang na bigyan ng lubos na pagkilala ang mga bayaning magsasaka at mangingisda na sektor na nagbubuhay sa atin, nagpapakain sa ating lalawigan, sa ating rehiyon at sa malaking bahagi ng ating bansa.

 

Ayon sa datos ng Philippine Statistics Authority taong 2014, 36% ng isda sa ating rehiyon ay nanggaling sa lalawigan ng Quezon, 38% ang kontribusyon ng Quezon sa produksyon ng palay, 43% ng kabuuang produksyon ng gulay sa rehiyon ay nanggaling sa lalawigan, 58% ang kontribusyon sa mais at 76% naman ang kontribusyon ng lalawigan sa niyog.

 

Ang lalawigan ng Quezon ang nagsisilbing Food Basket ng CALABARZON sapagkat humigit kumulang sa 50% ng mga pangunahing pagkaing ibinebenta at umiikot sa merkado sa rehiyon na gulay, bigas, isda, mais at niyog ay nanggaling sa Quezon.

 

Kaya naman ayon sa gobernador na napakahalaga na palakasin ang mga sektor sa ilalim ng agrikultura tulad na lang sa nagawa ng pamahalaang panlalawigan sa Corn Farmers Productivity Enhancement Program na may layuning pataasin ang productivity level sa bawat ektaryang taniman ng mais at higit sa lahat kumita ng mas malaki ang mga magsasaka.

 

Sa ilalim naman ng Rice Self-Sufficiency Program, ipinagmalaki ng gobernador ang patuloy na pagtaas nito mula sa 46.18% noong 2010, naging 52.94% noong 2011, 57.67% noong 2012 at pumalo sa 58.98% noong 2013.

 

Pinalakas ang Quezon Palay Seed Growers Association (QPSGA) at sa nakalipas na apat na taon ay umabot na sa 70% ang kabuuang dami ng certified seeds na ipinamamahagi ng pamahalaang panlalawigan ay mismong nanggaling sa QPSGA.

 

Inalalayan din ng pamahalaang panlalawigan ang iba’t ibang industry sa lalawigan tulad ng Mangosteen sa lungsod ng Tayabas na dumaan sa matinding pagsubok dahil sa pagtama ng peste.

 

Mabilis na umaksyon ang pamahalaang panlalawigan sa pamumuno ni Governor Suarez sa naturang industriya na tinipon ang mga miyembro ng Mangosteen Producers Association of Tayabas (MAPROTAS).

 

Kabilang sa napagkasunduan ng grupo at ng pamahalaang panlalawigan ang pagkakaroon ng greenhouse para sa produksyon ng de-kalidad na mangosteen seedlings, malawakang fertilization para sa mabilis na pagyabong ng mga halaman, pagsasanay mula sa mangosteen experts ng UPLB, massive planting at replanting program para sa karagdagang produksyon at naglabas ng pulisiya para maprotektahan at mapalaganap ang mangosteen Tayabas variety sa lalawigan.

 

Isa pa sa umuunlad na industriya sa lalawigan ay ang Uraro Industry na nanggaling sa Bondoc Peninsula at sagana sa bayan ng Mulanay, Catanauan at General Luna.

 

Ayon sa gobernador na napakalaki ng demand sa uraro cookies ngunit kinakapos ang raw materials at ito ang tutugunan ng pamahalaang panlalawigan.

 

Isa sa pangunahing hakbang na gagawin ng lalawigan kasama ang Southern Luzon State University at mga lokal na pamahalaan ay magtatayo ng sampung (10) ektarya ng Uraro Nursery sa Bondoc Peninsula. (Reygan Mantilla-Quezon PIO)

 
 
BACK