JATROPHA PLANTATION PROJECT NI GOB. NANTES ABOT KAMAY NA: TAGKAWAYAN JATROPHA FARMERS MULTI-PURPOSE COOPERATIVE TUTULUNGAN NG LAND BANK NA MAPABILIS ANG PAGKUHA NG P7.5M LOAN

MAY0 7, 2009, LUNGSOD NG LUCENA ---Abot-kamay na ang proyekto ni Gobernador Raffy P. Nantes na Jatropha Plantation. Tiniyak ng  Land Bank of the Philippines ( LBP ) sa mga opisyales at miyembro ng Tagkawayan Jatropha Farmers Multi-Purpose Cooperative ( TJFMPC ) na agarang ipo-proseso ang mga kinakailangang papeles upang mapabilis ang pagre-release ng initial na P7.5M na kanilang loan para sa pagtatanim, pagpapalaki at pag-ani ng jatropha curcas. Ito ay bahagi ng proyektong pang-agrikultura at pang-kabuhayan ni Gob. Nantes sa layuning maiangat ang antas ng pamumuay ng mga mamamayan sa lalawigan ng Quezon.

Bukod dito, inaasistehan din ang TJFMPC ng Quezon Jatropha Development Board ( QJDB ) sa teknikal  na  aspeto nang sa gayun ay higit pang lumawak ang kanilang kooperatiba at mapagkalooban ng karagdagang pagkakakitaan ang magsasaka ng Tagkawayan,Quezon.

Ibinatay ng LBP ang kanilang aksyon sa resulta ng isinagawang inspection sa Jatropha Nursery at Plantation sa Tagkawayan , Quezon kahapon, Mayo 6,2009. Pinangunahan ni G. Oscar Bunyi-Vice Chairman ng QJDB , na tumatayo ding project coordinator ang inspection kasama sina Gng. Minda de Torres, Andres Abary  Jr. At Roberto Atregenio Jr, samantalang sa panig ng LBP ay si Gng. Stella Mylene Villanueva, Property Appraiser , na nagsagawa ng interview sa mga opiyales at miyembro ng TJFMPC.

Ayon kay Gng. Villanueva, malaki ang posibilidad na mai-release na kaagad sa nasabing kooperatiba ang initial loan dahil sa nakita niyang katatayuan ng mga nakatanim nang jatropha. Malaki ang paniniwala nito na uunlad ang nasabing proyekto kung kaya’t inabisuhan niya ang mga TJFMPC na pinamumunuan ni G. Jun Serrano na isaayos kaagad ang mga papeles sa loan agreement.
Binanggit naman ni TJFMPC President Serrano na oras na mapasakamay na nila ang hinihiram na pondo ay mas magiging mapalawak pa ang mga lupang kanilang matataniman ng jatropha dahil makakabili na sila ng mga kinakailangang pestisidyo.
Sa kasalukuyan ay mahigit na sa 100 ektaryang  idle lands sa Tagkawayan, Quezon ang may tanim ng jatropha  at malaki ang posibilidad na lumawak pa ito lalo pa’t nagbigay na ng kasiguruhan ang LBP na tutulong sa mabilis na pagre-release ng pondo.