GOB.NANTES NAGKALOOB NG P2.6M HALAGA NG MGA GAMOT SA 13 DISTRICT HOSPITALS SA LALAWIGAN

HUNYO 8, 2009, LUNGSOD NG LUCENA ---Ipinagkaloob ni Gobernador Raffy P. Nantes sa 13 District Hospitals sa lalawigan ng Quezon ang ibat-ibang klase ng mga gamot na nagkakahalaga sa kabuuan ng P2,637,834.05.

Personal na tinanggap ng mga Director ng District Hospitals mula kay Gob. Nantes ang kahon ng mga gamot habang idinaraos ang regular na flag raising ceremony kaninang umaga na nagsilbing host ang tanggapan ng Provincial Accounting Office.

Ayon kay Provincial Planning and Development Officer ( PPDO ) Engr. Irma Garde na siyang nangasiwa sa programa, ang mga gamot na ipinagkaloob sa mga ospital sa lalawigan ay nanggaling sa share o kinita ng Pamahalaang Panglalawigan mula sa buwis ng Team Energy sa Pagbilao at Mauban Power Plant.

Katuparan rin aniya ito ng pangarap ni Gob. Nantes ani Engr. Garde na mapagkalooban ng sapat na serbisyo ang mga mamamayan sa aspeto ng kalusugan batay sa priority program na “ NANTES PO “. Idinagdag ni Engr. Garde na ang Quezon Medical Center ( QMC ) at dalawang iba pang district hospitals ay hindi nakabilang sa pagkakalooban ng mga gamot subalit ipagagawa naman ang kanilang mga pasilidad.

Inianunsyo ni Gob. Nantes na upang mas maging mabilis ang mobilisasyon ng serbisyong medikal sa mga malalayong barangay sa lalawigan ay magkakaloob siya ng karagdagang limang ambulansya sa QMC at tig-iisa sa mga district hospitals.